Inngangur

Git og GitHub: útgáfustýring, geymslur, útibú, pull requests, kóðarýni, commit skilaboð og góð vinnubrögð.

Git og GitHub eru lykilverkfæri í námskeiðinu. Þau eru notuð til að halda utan um verkefni, skrá breytingar, vinna saman í hópum og byggja upp skýra sögu um hvernig verkefni þróast yfir tíma.

Git og GitHub eru líka leiðandi verkfæri í atvinnulífinu, bæði í hugbúnaðarþróun, gagnavinnu, rannsóknum og tæknilegri skjölun. Þess vegna er mikilvægt að kunna ekki bara skipanirnar, heldur líka vinnubrögðin sem fylgja góðri útgáfustýringu.

Í þessum hluta er farið yfir grunnatriði í Git og GitHub, algengar skipanir og góð vinnubrögð sem nýtast í hópverkefnum og capstone-verkefninu.

Stoðefni

Í tölvunarfræði er í boði námskeiðið Tölvur, stýrikerfi og tölvufærni sem gagnast vel þeim sem vilja styrkja grunninn í tölvuvinnu. Námskeiðið er hægt að fara yfir á eigin hraða í sjálfsnámi.

Í þessum hluta styðjumst við sérstaklega við kafla 7 um Git. Sjá YouTube playlista.

Hvað er Git?

Git er dreift útgáfustjórnunarkerfi (version control system) sem heldur utan um breytingar í kóða, gögnum og textaskrám yfir tíma. Með Git getið þið:

séð hvað breyttist, hvenær og af hverjum,
farið til baka í fyrri útgáfur ef eitthvað fer úrskeiðis,
unnið í greinum (branches) án þess að skemma aðalútgáfuna,
sameinað vinnu margra í sama verkefni á rekjanlegan hátt.

Myndband: Fyrirlestur 7.1 — Útgáfustýringarkerfi og gagnalíkan Git

Úr stoðefninu Tölvur, stýrikerfi og tölvufærni.

Hvað er GitHub?

GitHub er vefþjónusta fyrir Git-kóðageymslur (repositories) og samstarf. Slík kóðageymsla er iðulega kölluð repo í daglegu tali. Í þessu námskeiði notum við GitHub til að halda utan um verkefni, pull requests, kóðarýni, issues og sameiginlega vinnusögu hópsins.

GitHub býður meðal annars upp á:

repositories til að geyma og deila verkefnum,
pull requests fyrir tillögur að breytingum og kóðarýni,
issues og Projects til að skipuleggja verk,
GitHub Pages til að birta skýrslur og verkefni á vef,
Actions fyrir sjálfvirkar keyrslur og prófanir.

GitHub reikningur og háskólanetfang

Þið þurfið GitHub reikning sem er tengdur háskólanetfangi ykkar. Ef þið eigið nú þegar GitHub reikning er nóg að bæta @hi.is netfanginu við sem aukatölvupósti (alternate/secondary email) í stillingum GitHub.

Nemendur geta einnig sótt um GitHub Education aðgang, sem getur veitt aðgang að GitHub Pro og ýmsum náms- og þróunartólum án endurgjalds.

Markmið

Eftir þennan hluta ættuð þið að geta:

útskýrt muninn á Git og GitHub,
klónað geymslu og unnið með hana á eigin tölvu,
notað helstu Git-skipanir eins og status, add, commit, pull og push,
skrifað skýr og gagnleg commit skilaboð,
unnið með branches og pull requests,
notað issues til að halda utan um þróun verkefnis og Projects til að skipuleggja verklag,
tekið þátt í kóðarýni og samvinnu í GitHub.